പ്‌ളെയിൻ /കാർ മുന്നോട്ട് കുതിക്കുമ്പോൾ അതിൽ പൊങ്ങിക്കിടക്കുന്ന ബലൂൺ എങ്ങോട്ടായിരിക്കും പോവുക ?

നമ്മൾ ഇപ്പോൾ ഒരു വിമാനത്തിൽ അല്ലെങ്കിൽ ഒരു കാറിനു അകത്താണെന്നു വിചാരിക്കുക. വിൻഡോ എല്ലാം അടിച്ചു ഭദ്രമായി. കാർ ഇപ്പോൾ നിൽക്കുകയാണ്. അതിൽ പെൻഡുലം കണക്കെ ഒരു കട്ടി മുകളിൽ റൂഫിൽ നിന്നും തൂക്കി ഇട്ടിട്ടുണ്ട്. കൂടാതെ ഒരു ഹീലിയം നിറച്ച ബലൂണും തറയിൽ കൊളുത്തി വച്ചിട്ടുണ്ട്. അപ്പോൾ ബലൂൺ പൊങ്ങി കിടക്കും എന്നു പ്രത്യേകിച്ച് പറയേണ്ടല്ലോ. ചിത്രം നോക്കുക.

ഇനി പ്‌ളെയിൻ /കാർ മുന്നോട്ട് കുതിക്കുകയാണ്. അപ്പോൾ സ്വാഭാവികമായും അതിലിരിക്കുന്ന സകലതും പിന്നോട്ട് പോകും / ആയും. ( Newton's First Law of Motion ). പക്ഷെ പൊങ്ങിക്കിടക്കുന്ന ബലൂൺ എങ്ങോട്ടായിരിക്കും പോവുക ?

A ) പിന്നോട്ട് ?

B ) മുന്നോട്ടും, പിന്നോട്ടും പോവില്ല.

C ) മുന്നോട്ട് ?

.

.

A ) പിന്നോട്ട് പോവും എന്നാണ് യുക്തിപരമായി ആലോചിച്ചാൽ നാം പറയുക. അതാണ് നമ്മുക്ക് പരിചിതമായിട്ടുള്ളത്. പക്ഷെ അതല്ല യഥാർത്ഥത്തിൽ സംഭവിക്കുക. C ) മുന്നോട്ട്  ആണ് ബലൂൺ ആയുക. ബ്രെക്ക് ഇടുമ്പോൾ നമുക്ക് എതിരായി പിന്നോട്ടും പോവും.

എന്തായിരിക്കും അതിനു കാരണം ?? 

ആടുജീവിതവും, സൂര്യോദയവും.

ബെന്യാമീന്റെ ആടുജീവിതം എന്ന നോവലിൽ  അതിരാവിലെ ' ഉച്ചക്കെന്നപോലെ കത്തുന്ന ' സൂര്യനെക്കുറിച്ച് പ്രതിപാദിക്കുന്നുണ്ട്. സൂര്യൻ ഇത്ര ദാക്ഷണ്യം ഇല്ലാത്തതാണോ എന്നു നമുക്ക് തോന്നിപ്പോവും. 

മരുഭൂമിയിലെ സൂര്യോദയം നമ്മുടേതിൽനിന്നു വിത്യസ്തമാണോ ?

മരുഭൂമിയിൽ സാധാരണ മേഘങ്ങൾ കാണാറില്ല. പൊടിക്കാറ്റ് ഇല്ലാത്ത സമയം അത്രയും  ആകാശം  നീല നിറത്തിലായിരിക്കും. അതുപോലെ മരങ്ങളോ, സൂര്യനെ മറയ്ക്കുന്ന ഒന്നുമേ അവിടെ ഇല്ല.  നമ്മുടെ നാട്ടിൽ ആണെങ്കിൽ ധാരാളം മേഘങ്ങൾ ഉണ്ടാവും. സൂര്യോദയത്തിന്റെ സമയം 6:30 ആയിരുന്നാൽപോലും  നാം കാണുന്ന സൂര്യോദയം 7 മണിക്ക് ആയിരിക്കും. അതും ചക്രവാളത്തിനും കുറ  മുകളിൽ മേഘത്തിനു ഇടയ്ക്കായി. സൂര്യൻ നന്നായി തെളിച്ചം    വയ്ക്കുന്നത് 1 മണിക്കൂർ ഒക്കെ കഴിഞ്ഞിട്ടാവും. അതുപോലെ സൂര്യാസ്തമയവും. ഒന്നു- ഒന്നര മണിക്കൂർ നീണ്ടു നിൽക്കും.

ഒരിക്കൽ ബാങ്ക്ലൂർ നന്ദി ഹിൽസിൽ ഷൂട്ടിങ് നു പോയ സിനിമാക്കാരുടെ കുറിപ്പ് വായിച്ചതോർക്കുന്നു.

നായിക തട്ടവും പിടിച്ച സൂര്യോദയ സമയത്തു ഓടുന്നതാണ് സീൻ. അതിനായി സോര്യോദയത്തിനു മുന്നേ സെറ്റ്  എല്ലാം റഡി ആക്കി കാത്തിരുന്നു. സൂര്യൻ ഉദിച്ചപ്പോൾ ഒരു റിഹേഴ്സൽ കൂടെ  ചെയ്തു. 1o മിനിറ്റു   റിഹേഴ്സൽ കഴിഞ്ഞപ്പോൾ സൂര്യൻ ചുവപ്പ് നിറം  മാറി കത്താൻ തുടങ്ങി. നട്ടുച്ച പോലെ ആയി. പിന്നെ അടുത്ത ദിവസം വരെ കാത്തിരുന്നിട്ടാണ് അവർക്കു ഷൂട്ട് ചെയ്യാൻ പറ്റിയത്.

രാവിലെയും വൈകീട്ടും സൂര്യ രശ്മി ഭൂമിയുടെ അന്തരീക്ഷത്തിലൂടെ കൂടുതൽ ദൂരം സഞ്ചരിച്ചിട്ടാണ് നമ്മുടെ കണ്ണുകളിൽ എത്തുക. അപ്പോൾ സൂര്യനിൽ നിന്നുള്ള ശക്തിയേറിയ കിരണങ്ങളായ അൾട്രാ വയലറ്റും, പിന്നെ വയലറ്റ്,   ഇൻഡിഗോ, നീല ഒക്കെ നശിച്ചു പോകുന്നു. ബാക്കി വരുന്ന തീവ്രത കുറഞ്ഞ ചുവപ്പും, ഓറഞ്ചും,  മഞ്ഞയും മാത്രമേ  നമ്മുടെ കണ്ണിൽ എത്തുന്നുള്ളൂ. നമ്മുടെ അന്തരീക്ഷത്തിനു കുറച്ചുകൂടെ കട്ടി ഉണ്ടായിരുന്നെങ്കിൽ സൂര്യോദയവും, സൂര്യാസ്തമയവും നമുക്ക് ഇതുപോലെ കാണുവാൻ കഴിയുമായിരുന്നില്ല.

അപ്പോൾ അന്തരീക്ഷം ഇല്ലാത്ത ചന്ദ്രനിലെ സൂര്യോദയം എങ്ങനെ ഇരിക്കും ?

സൂര്യൻ ചക്രവാളത്തിൽ നിന്നും ഉയർന്നു വരുമ്പോൾത്തന്നെ അതിനു നട്ടുച്ചയുടെ തീവ്രതയും, ചൂടും ഉണ്ടാവും. എന്നാൽ ചന്ദ്രന്റെ പ്രതലത്തിൽ പ്രകാശം ചരിഞ്ഞു വീഴുന്നത് കാരണം ചന്ദ്രോപരിതലത്തിൽ ചൂട് കുറവായിരിക്കും. പക്ഷെ  അതിരാവിലെ നമ്മുടെ മുഖത്തു വീഴുന്ന പ്രകാശത്തിനു 100 ഡിഗ്രിക്കു മുകളിൽ ചൂട് ഉണ്ടായിരിക്കും.

ലക്‌സും, ജൂനോ യും. ( ജൂനോ: 5/7/2016 ഇൽ വ്യാഴത്തിൽ എത്തിയ ഉപഗ്രഹം )

എന്താണ് ലക്സ് ( Lux ) ? 
പ്രകാശം ഒരു ഇടത്തു വീഴുമ്പോൾ ഉള്ള ശോഭയുടെ / തെളിച്ചത്തിന്റെ അളവുകോലാണ് ലക്സ്. ഒരു മെഴുകുതിരി കത്തുമ്പോൾ അതിനു 1 മീറ്റർ ദൂരെ ലംബമായി സ്ഥിതിചെയ്യുന്ന ഒരു ചതുരസ്ര മീറ്റർ പ്രതലത്തിൽ വീഴുന്ന പ്രകാശത്തെ 1 ലക്സ് ആയി കണക്കാക്കാം. നമുക്ക് ന്യൂസ്‌പേപ്പറും, ടെക്സ്ററ് ബുക്കും ഒക്കെ വായിക്കുവാൻ ഏതാണ്ട് 300 ലക്സ് പ്രകാശം വേണം. എന്നാൽ വളരെ സൂക്ഷ്മത വേണ്ട കാര്യങ്ങൾ ചെയ്യുവാൻ 500 ലക്സ് പ്രകാശം വേണം. അതിനൊക്കെ അനുസരിച്ചായിരിക്കണം നമ്മൾ വീട്ടിലും, ഓഫീസിലും ഒക്കെ ഓരോ ഇടത്തിലും ലൈറ്റ് കൊടുക്കേണ്ടത്.
.
സൂര്യപ്രകാശത്തിന്റെ നേരിട്ടുള്ള ലക്സ് ലെവൽ എത്ര ഉണ്ടാവും ? 100,000 ലക്സ്.
ഇതു മേഘം ഒന്നും ഇല്ലാതെ സൂര്യൻ നേരെ തലയ്ക്കു മുകളിലുള്ള നട്ടുച്ച നേരത്തെ ലക്സ് ലെവൽ ആണ്. എന്നാൽ സൂര്യൻ വശങ്ങളിലേക്ക് പോകുംതോറും പ്രകാശ തീവ്രതയും കുറയുന്നു. ഇതു പ്രകാശം നേരെ ലക്സ് മീറ്ററിൽ വീഴുന്ന കാര്യം ആണ്. എന്നാൽ തണലത്തെ ലക്സ് ലെവൽ ഏകദേശം 10,000 ആണ്. നമുക്ക് നന്നായി വായിക്കാൻ ആവശ്യമുള്ളത് 500 ലക്‌സും, പകലത്തെ പുറത്തെ ലക്സ് 10,000 വും ആണ്. എന്നു വച്ചാൽ നമുക്ക് ആവശ്യമുള്ളതിന്റെ 20 ഇരട്ടി പ്രകാശം. നമ്മുടെ കണ്ണിന്റെ കൃഷ്ണമണി തനിയെ അഡ്ജസ്റ് ചെയ്യുന്നത് കാരണം ആണ് ഈ വിത്യാസം നമുക്ക് അത്ര ബുദ്ധിമുട്ട് തോന്നാത്തത്.
.
ജൂനോ ഉപഗ്രഹം ഇന്ന് വ്യാഴത്തിന്റെ ഭ്രമണ പഥത്തിൽ എത്തി. ജൂനോ പ്രവർത്തിക്കുന്നത് സോളാർ പാനലിൽ നിന്നുള്ള പ്രകാശം മൂലം ആണ്. വ്യാഴത്തിന് അടുത്തു സോളാർ പാനലിൽ ആവശ്യമുള്ള പ്രകാശം കിട്ടുമോ എന്നു എങ്ങനെ നാസ തീരുമാനിച്ചു ? അവിടെ ആണ് ശാസ്ത്രീയമായ സൂത്രവാക്യങ്ങൾ ഫലപ്രദമാവുന്നതു.
വ്യാഴം ഭൂമിയെക്കാൾ 5 മടങ്ങു ദൂരെ ആണ്. അപ്പോൾ അവിടെ എത്രമാത്രം ലക്സ് പ്രകാശം ഉണ്ടാവും ?
ഭൂമിയിൽ ലഭിക്കുന്ന ലക്സ് 100,000.
ദൂരം കൂടുന്നതിന് അനുസരിച്ച് ഇരട്ടി ആയി ലക്സ് കുറയും.
എന്നു വച്ചാൽ ദൂരം ഇരട്ടി ആവുമ്പോൾ ലക്സ് നാലിൽ ഒന്നാവുന്നു.
ദൂരം 5 ഇരട്ടി ആവുമ്പോൾ ലക്സ് ഇരുപത്തഞ്ചിൽ ഒന്നാവുന്നു.
അപ്പോൾ വ്യാഴത്തിൽ ഭൂമിയിലേതിന്റ്റെ 1/25 ലക്സ് ഉണ്ടാവും.
100,000 / 25 = 4000 ലക്സ്.
( ഭൂമിയുടെ അന്തരീക്ഷത്തിലൂടെ ഉള്ള ലക്സ് ലെവൽ ആണിത്. അന്തരീക്ഷം ഇല്ലെങ്കിൽ പ്രകാശം ഇതിലും കൂടുതൽ ആയിരിക്കും)
4000 ലക്സ് എന്നത് നമുക്ക് നന്നായി വായിക്കുവാൻ ആവശ്യമായതിന്റെ 8 ഇരട്ടി പ്രകാശം ആണ്.
ഭൂമിയിലേതിന്റെ 25 ഇൽ ഒന്നു പ്രകാശമേ വ്യാഴത്തിൽ ഉള്ളൂ എങ്കിലും സോളാർ പാനലിനു അത്യാവശ്യം വേണ്ട പ്രകാശം അവിടെ ലഭ്യമാണ്. 

.
നമുക്ക് വീട്ടിൽ അത്യാവശ്യം ആവശ്യമുള്ള ലക്സ് ലെവൽ എത്രയാണ് എന്നു നോക്കാം.
ടി വി കാണുന്ന ഇടം - 100 ലക്സ്.
പഠന മുറി - 300 ലക്സ്.
കിടപ്പു മുറി.- 50 ലക്സ്
അടുക്കള - 300 - 400 ലക്സ് ( അരിയിലുള്ള കല്ലൊക്കെ പെറുക്കി കളയാനുള്ളതല്ല :D )
ഇപ്പോൾ ലക്സ് മീറ്റർ ആപ്ലിക്കേഷനുകൾ മൊബൈലിൽ ഫ്രീ ആയി ലഭ്യമാണ്. 

സോളാർ മിനിമം വരുന്നു... ഭൂമി തണുത്തുറയുമോ ?

" സൂര്യനിലെ മാറ്റം ഭയപ്പെടുത്തുന്നത്, ഭൂമി തണുത്തുറയും...", " 2019-2020 വർഷത്തിൽ ഭൂമി തണുത്തു വിറയ്ക്കും, 5 നൂറ്റാണ്ടിനിടയിലെ സോളാർ മിനിമം പ്രതിഭാസം വരുന്നു", " സൂര്യന് ചൂടില്ല .. ശാസ്ത്രജ്ഞർ ", " വരുന്നൂ ഹിമയുഗം", "ശാസ്ത്രജ്ഞന്മാരുടെ മുന്നറിയിപ്പ്! സൂര്യന്‍ ചൂടിലല്ല, ഭൂമി ഹിമയുഗത്തിലേക്ക്, കൊച്ചിക്കായല്‍ പോലും തണുത്തുറഞ്ഞുപോകുമത്രേ", " ലോകം ഹിമയുഗത്തിലേക്ക്", "സൂര്യന് ചൂടില്ല, ഭൂമി ഹിമയുഗത്തിലേക്കെന്ന് ശാസ്‌ത്രജ്ഞരുടെ മുന്നറിയിപ്പ്",.. എന്നിങ്ങനെ വാർത്തകൾ ഈ കഴിഞ്ഞ ദിവസം പ്രചരിക്കുകയുണ്ടായി. സത്യത്തിൽ എന്താണ് ഇതിനു പിന്നിൽ ? 

സൗരവാതം ആണ് വില്ലൻ. രാവിലെയോ, വൈകീട്ടോ സൂര്യനെ ബൈനോക്കുലർ ഉപയോഗിച്ച് നോക്കിയിട്ടുള്ളവർ സൂര്യനിൽ ചില കറുത്ത കുത്തുകൾ കണ്ടിരിക്കും. സൺ സ്‌പോട്ടുകളാണ് അവ. ഒരേ സമയം നമുക്ക് ധാരാളം സൺ സ്പോട്ടുകൾ കാണുവാൻ സാധിക്കും. ചിലതു ഭൂമിയെക്കാൾ പല മടങ്ങു വലിപ്പമുള്ളതാവും. സൂര്യന്റെ ഉപരിതലത്തിലെ പ്ലാസ്മയും, ഇലക്ട്രോൺ, പ്രോട്ടോൺ, ആൽഫാ പാർട്ടിക്കിൾ എന്നിവ അഗ്നിപർവ്വത സ്ഫോടനത്തിൽ എന്നപോലെ പുറത്തേക്കു വരുന്ന ഇടമാണിത്. മറ്റു ഭാഗങ്ങളെ അപേക്ഷിച്ച് ചൂട് നന്നായി കുറഞ്ഞ ഭാഗം ആണ് അതു. മിക്കവാറും സൗരവാതം സൂര്യനിലേക്കു തന്നെ തിരിച്ചു വീഴുന്നു. എന്നാൽ വേഗത ഏറിയതു പുറത്തേക്കു വരുന്നു. ഇവയ്ക്കു സെക്കന്റിൽ 400 കിലോമീറ്റർ മുതൽ 750 കിലോമീറ്റർ വരെ വേഗത ഉണ്ടാവാം. സൗരവാതം നമ്മളെ എല്ലാം ചുട്ടുകരിക്കാൻ ശേഷി ഉള്ളതാണ്. എന്നാൽ ഭൂമിയുടെ കാന്തിക മന്ധലം ഒരു കുട പോലെ വർത്തിച്ചു അവയെ തടുക്കുന്നു. ഈ ചാർജുള്ള കണങ്ങൾ കാന്തിക മേഖലയുടെ പ്രത്യേകതകൾ കാരണം ധ്രുവ പ്രദേശങ്ങളിൽ ഭൂമിയുടെ ഉപരിതലത്തിനു കൂടുതൽ അടുത്തു വരികയും, നിർവീര്യമാവുകയും ചെയ്യുന്നു. അതാണ് " അറോറ " എന്നപ്രതിഭാസം . സൺ സ്പോട്ട് ചൂട് കുറഞ്ഞ ഭാഗം ആണ് എങ്കിലും സൂര്യനിൽ നിന്നു സൗരവാതവും, കൂടുതൽ ചൂടും പുറത്തു വരുന്നത് അതിലൂടെ ആണ്. ചില ദിവസങ്ങളിൽ 250 വരെ സൺ സ്പോട്ടുകൾ ഉണ്ടാവാറുണ്ട്. ചിലപ്പോൾ ഒന്നും കാണില്ല. കൂടുതൽ സൺ സ്പോട്ട് ഉണ്ടെങ്കിൽ സൂര്യൻ ആക്റ്റീവ് ആണ് അല്ലെങ്കിൽ " സോളാർ മാക്സിമം " ആണ് എന്നു പറയും. സൺ സ്പോട്ട് കുറഞ്ഞാൽ അതിനെ " സോളാർ മിനിമം " എന്നും പറയും.
ഇത്രയും നാളത്തെ നിരീക്ഷണങ്ങളിൽ നിന്നു സൂര്യൻ ഏതാണ്ട് 11 വർഷം കൂടുമ്പോൾ സോളാർ മിനിമവും, മാക്സിമവും സംഭവിച്ച് ഒരു സൈക്കിൾ പൂർത്തിയാക്കുന്നു എന് കാണാം. ഇതു ഇങ്ങനെ കാലാകാലങ്ങളായി സംഭവിച്ചുകൊണ്ടിരിക്കുന്നു. എന്നാൽ 1650 മുതൽ 1710 വരെ കാലയളവിൽ കാര്യമായ സോളാർ മാക്സിമം സംഭവിച്ചിട്ടില്ല. ( ചിത്രത്തിലെ ഗ്രാഫ് ശ്രദ്ധിക്കുക ) സൺ സ്പോട്ടുകളുടെ എണ്ണം അന്ന് 5o ഇൽ താഴെ ആയിരുന്നു. ഈ കാലഘത്തിനെ " മൗണ്ടർ മിനിമം " എന്നു പറയുന്നു. ആ കാലഘട്ടം ആവർത്തിക്കുമോ എന്നാണ് ഇപ്പോൾ ചിലരുടെ സംശയം. അന്ന് 60 വർഷകാലം സോളാർ മിനിമം ഉണ്ടായിട്ടും സാധാരണയിൽ അൽപ്പം താപനില കുറഞ്ഞു എന്നു മാത്രമാണ് രേഖകളിൽ പറയുന്നത്. അതും ധ്രുവ പ്രദേശങ്ങളോട് അടുത്ത ഇടങ്ങളിൽ.
2019-2020 കളിലും, 2030 ലും സോളാർ മിനിമം ഉണ്ടാവും. അതു അങ്ങനെ സംഭവിച്ചുകൊണ്ടേ

ഇരിക്കും. ബാക്കി എല്ലാ മാധ്യമ സൃഷ്ടി മാത്രം.

അന്താരാഷ്‌ട്ര ബഹിരാകാശ നിലയം ( ഇന്റർനാഷണൽ സ്പേസ് സ്റ്റേഷൻ : ISS )

മനുഷ്യർക്ക്‌ ബഹിരാകാശത്തു താമസിച്ചു ഗവേഷണങ്ങൾ ചെയ്യുവാനായി നിർമിച്ചിരിക്കുന്ന ഒരു പടുകൂറ്റൻ ഉപഗ്രഹ സമുച്ചയം ആണു ISS .
അമേരിക്ക, ജപ്പാൻ, റഷ്യ, ചൈന യൊറോപ്യൻ യൂണിയനിലെ 11 രാജ്യങ്ങളും ആണു ഈ പദ്ധതിക്ക് പിന്നിൽ.
ISS ഏകദേശം 400 കിലോമീറ്റർ ഉയരത്തിൽ സെക്കന്റിൽ 7.6 കിലോമീറ്റർ വേഗതയിൽ 92 മിനിറ്റ് കൊണ്ടു ഭൂമിയെ ചുറ്റിക്കൊണ്ടിരിക്കുന്നു.

ISS -നെ നമുക്ക് നഗ്ന നേത്രങ്ങൾ കൊണ്ടു കാണുവാൻ സാധിക്കും.
ദിവസവും ISS പല പ്രാവശ്യം നമ്മുടെ തലയ്ക്കു മുകളിലൂടെ സഞ്ചരിക്കും എങ്കിലും ഇത്ര ദൂരെ ആയതു കാരണം നമുക്ക് മനസ്സിലാക്കുവാൻ സാധിക്കാറില്ല. എന്നാൽ ഇവിടെ ഇരുട്ടും, 400 കിലോമീറ്റർ മുകളിൽ സൂര്യപ്രകാശവും ഉള്ളപ്പോൾ നമുക്ക് ISS നെ എളുപ്പം കാണാം.
സൂര്യോദയത്തിനു 90 മിനിറ്റ് മുൻപുള്ള സമയവും, സൂര്യാസ്തമയത്തിനു ശേഷമുള്ള 90 മിനിറ്റ് വരെയുള്ള സമയങ്ങളിൽ ISS നമ്മൾ നില്ക്കുന്നതിനു 1000 കിലോമീറ്റർ ദൂര പരിധിയിൽക്കൂടെ കടന്നുപോയാൽ നമുക്ക് കാണുവാൻ സാധിക്കും.
* ഇന്ത്യ, ഗൾഫ് എന്നീ പ്രദേശങ്ങളിൽ ISS പോകുന്നതു 2 ദിശകളിൽ ആണ്.
1) വടക്കു പടിഞ്ഞാറു നിന്നും തലയ്ക്കു മുകളിലൂടെ തെക്ക് കിഴക്കോട്ട്.
2) തെക്ക് പടിഞ്ഞാറു നിന്നും തലയ്ക്കു മുകളിലൂടെ വടക്കു കിഴക്കോട്ട്.
ഈ മുകളിൽ പറഞ്ഞ ദിശയിലോ.. അല്ലെങ്കിൽ അതിനു സമാന്തരം ആയിട്ടോ മാത്രമേ നമുക്ക് ISS നെ കാണുവാൻ സാധിക്കൂ.

ISS ഉം ആയി ബന്ധപ്പെട്ടു ധാരാളം ആപ്ലിക്കേഷനുകളും മൊബൈൽ ഫോണിലും, നെറ്റിലും ലഭ്യമാണു.
ISS പോകുന്ന ഓർബിറ്റ് കാണാം, ഇപ്പോൾ ഉള്ള സ്ഥലം കാണാം. ISS ഇൽ നിന്നും ഉള്ള പല പല ഹൈഡെഫനീഷൻ ക്യാമറയിൽ നിന്നുള്ള ലൈവ്, എപ്പോഴെല്ലാം നമുക്ക് ISS കാണുവാൻ സാധിക്കും എന്നും, അതിന്റെ ദിശ ഒക്കെ അറിയുവാനും നമുക്ക് ആപ്ലിക്കേഷൻ മുഖേന സാധിക്കും.
അതിൽ പ്രധാനമായ 2 ആപ്ലിക്കേഷനുകൾ ഇവിടെ പരിചയപ്പെടുത്താം.

1)http://www.isstracker.com
ഇതിൽ ISS ഇപ്പോൾ പൊയ്ക്കൊണ്ടിരിക്കുന്നതും, ഇനി വരാൻ പോകുന്ന 2 ഓർബിറ്റുക്കളും കൃത്യമായി കാണിക്കും. കൂടാതെ സമയം കൊടുത്താൽ ആ സമയത്ത് ISS ഉള്ള സ്ഥാനവും മറ്റും കിട്ടും. ഇനി നമ്മൾ പുറത്തു നിൽക്കുമ്പോൾ കണ്ടതു ISS ആണോ എന്ന് സംശയം ഉണ്ടെകിൽ ആ സമയം ഈ പേജിൽ കൊടുത്താൽ അതിന്റെ സ്ഥാനം കിട്ടും. അങ്ങനെ നമ്മൾ നിന്നിടത്താണോ ISS ആ സമയം ഉണ്ടായിരുന്നതു എന്നും മനസ്സിലാക്കാം.

2)http://iss.astroviewer.net/observation.php?
ഇതിൽ നിന്നും ലോകത്തിലെ ഒട്ടുമിക്ക സ്ഥലങ്ങളും തിരഞ്ഞു.. അവിടെ നമുക്ക് ISS ഇനി വരുന്ന കുറച്ചു ദിവസങ്ങളിൽ എപ്പോൾ, ഏതു ദിശയിൽ, എത്ര തെളിഞ്ഞു കാണാം എന്നൊക്കെ മനസ്സിലാക്കാം.

ആദ്യം "Your location " എന്നുള്ളിടത്ത് നിങ്ങളുടെ സ്ഥലം കൊടുക്കുക. സെർച്ച് ചെയ്യുക.
ISS കാണാൻ സാധിക്കുന്ന അടുത്ത കുറച്ചു ദിവസങ്ങൾ താഴെ കാണിക്കും.
ദിശയും, തെളിച്ചവും വലതു വശത്തെ ചിത്രത്തിൽ കാണിക്കും.
ഇതിൽ ശ്രദ്ധിക്കാനുള്ളത് മാഗ്നിറ്റ്യൂഡ് ആണു. മൈനസ് ( - ) വാല്യു കൂടുമ്പോൾ തെളിച്ചം കൂടും. -3.4 ആണു ISS കാണുന്നതിൽ ഏറ്റവും തെളിഞ്ഞത്.
-2.0 ഒക്കെ ആവുമ്പോൾ തെളിച്ചം നനായി കുറയും. കൂടാതെ " Maximum " എന്നത് 30 മുതൽ 90 വരെ ആണു കാണാൻ എളുപ്പം. 90 ആയാൽ തലയ്ക്കു മുകളിൽ എന്നാണു.
ISS ഭൂമിയുടെ നിഴലിൽ ആവുമ്പോൾ കാണാൻ സാധിക്കതാവുന്നു. അതുകൊണ്ടു ISS പോകുന്നതു കാണുന്നതു പാതി വഴിയിൽ മങ്ങി മങ്ങി കാണാൻ പറ്റാതാവും.
നമ്മുടെ ശുക്രനെപ്പോലെതന്നെ നന്നായി തിളക്കമുള്ളതാണു ISS .